番黎隔一日, 女友就推薦呢間佢之前同朋友食完既越南菜, 終於有得食啦
除左入鋪內坐之外~ 都有D 半戶外既位
意思係有瓦遮頭之餘又可以享受戶外既自然風
我地見今晚有少少凍, 就揀坐入面~
坐低諗左陣就好快咁一人叫左一個主菜~再叫左一份小食同一杯飲品
首先到既係小食越南春卷~
有跟埋一份生菜比你包住黎食, 隨個人喜好~
春卷本身炸得比較耐, 未去到燶既地步, 非常脆同香口
怕熱氣既可以包埋生菜, 順便減一減油膩感
餡料唔少, 可以稱得上足料
跟住到既係其中一杯佢地既推介~青檸薄荷沙冰
係沙冰入面可以見到有唔少既薄荷葉碎, 薄荷味非常足夠
青檸味相比就會冇咁突出, 慢慢品嚐先會FEEL到薄荷下既另一種清新味
份量都唔細, 非常適合鍾意薄荷飲品既人~
之後係間間越南菜都會有既生牛河~亦係我至愛既主食~
呢度既主食真係好大碗下, 一見到我就放心唔洗諗宵夜食乜
個湯底比較清香, 冇一般連鎖店咁鹹, 香料味足, 牛味唔錯
牛肉量唔少, 肉味唔錯, 粉真係幾多, 食完幾飽下
女友既燒豬頸肉濱海都有驚喜~好大碗
燒豬頸肉處理得好好, 非常香脆又有肉味, 一流
連埋菠蘿同埋煎過少少既米粉用生菜一次過包住, 再點少少魚露黎食就係正宗既食法
咁樣食又真係別有風味, 菠蘿既甜同爽口解左燒豬頸肉既肉膩感, 加埋生菜配合得好好食
不過都係太大碗, 女友食唔晒唯有我包底食多舊
食物質素不俗, 價錢唔太貴, 又近女友放工, 絕對可以再黎食既越南菜
