圓貝 (大王東街) (已結業)

早幾日喺灣仔行街，見有啲口渴，喺大王東街見到呢間門面幾靚嘅手搖飲品舖「圓貝」，貪新鮮於是決定試試佢，結果發現係無揀錯嘅！呢到嘅手搖飲品有自選配搭，亦都可以跟餐牌嗌，研究完一輪之後，就揀咗香芒黃金冰，材料包括芒果、雪燕、紫米、珍珠同埋椰子奶蓋，初時都有啲擔心會唔會伏嘅等咗5分鐘之後飲品拎到手，即刻試飲一啖，透心涼之餘，亦有種熟悉嘅感覺！無錯啦，就好似好耐以前許留山嗰啲特飲咁，自從執咗之後都好耐無試過飲到呢類飲品啦。所有材料配合得好好，紫米綿滑、珍珠口感彈牙（後尾先發現係活性碳）、鮮芒果冰同椰子奶蓋甜度適中，有如食緊芒果紫米露一樣！不過價位比起其他手搖飲品店嘅產品稍高，睇嚟要努力儲多啲 $$ 先可以密啲嚟飲啦！