一寿司 (已結業)

今日午餐今得太飽，晚上仲未肚餓，因此決定食好耐無食嘅黑夜壽司。之前嘅經驗，確保第一輪入到，早一個鐘等就一定得，9點幾開始有人龍。店員會早少少派紙劃食物，9:50都已經入得。一坐低就叫得。可惜店員落錯單，食物較遲先送上。三文魚同火炙三文魚都新鲜好味，火炙就因為燒過更肥美香口。帆立貝好大件，尚算滑同甜。特長海饅係每次嚟都要叫，長長嘅海饅見唔到舊飯，正。饅魚都好味，又係必叫之選。季節限定嘅但馬牛柳三食都唔差，生牛肉略略燒過，加上黑椒幾夾。旁邊嘅立魚就普普通通。鵝肝壽司好大件鵝肝，煎過後逼出油脂，好惹味。估唔到嘅係蟹籽甜蝦軍艦嘅甜蝦好肥美。海膽呑拿魚蓉就無咩特别。葱吞拿魚，海膽同三文魚籽手卷唔差，飽肚之選。最後再講嘅係中伏之選。劍魚壽司，魚生一塊勁薄，無咩魚味，有d位幾難咬開，勁唔新鮮。King Kong卷有四件，但一望就知材料好唔新鮮，亦食唔到海鮮味，魚生好薄，咬落質感好似放左好耐咁。之前都試過其他卷物，結論係叫返壽司吧！