スーパー丼 (駱克道) (已結業)

今日同朋友收工過銅鑼灣搵食，朋友知我鍾意食丼飯，特登帶咗我嚟SUPERDON。Superdon位置好易搵，一出地鐵站對面就係！可能因為未到rush hour，等咗陣就有位喇！入到去見到主要裝修都係白色，感覺好清新！ 因為朋友鍾意熱食，我就鍾意刺身，所以叫咗一個北海道帆立貝·北寄貝·赤貝丼同埋一個特上天婦羅丼嘅set，大家可以share食。首先就上咗刺身丼，跟set有埋沙律小食同味噌湯（係我最愛嘅味噌湯！）沙律都唔係淨係得菜，仲有蟹肉同柚子，食落有口感又夠fresh! 刺身主要有三種貝類，三種都係我鍾意食嘅！帆立貝好夠味同新鮮，肉質又厚；赤貝就好爽口；而北寄貝就夠大塊，口感亦都好好！三種刺身堆滿成個丼！好滿足！ 之後朋友叫嘅天婦羅丼都跟住上，我都有偷咗啲嚟食！啲天婦羅炸得啱啱好，食落唔會成口油，口感亦都好脆，尤其係蝦天婦羅，因為啲蝦好新鮮，所以炸做天婦羅啲肉都仲好彈口！ 值得一提就係superdon嘅service好好，我跌咗筷子唔夠三秒就有侍應拎對新嘅比我！ 總括嚟講superdon食物夠高質，地利位置方便，如果鍾意食丼飯嘅朋友都可以去試下！