平日晚市7點，已有唔少客人，枱與枱之間距離唔會好近，重點係張枱好大，夠位放好多小菜，而且環境舒服。
免治雞肉棒三色套餐($68)，大推，因為超級好食。一咬，雞肉汁爆出黎，雞軟骨打碎後仲帶有口感，有細粒軟骨，非常juicy。三種口味中，明太子最濃，而柚子味清爽。
三文魚籽黃金醬燒元貝($50)，一客2大隻好抵食而且元貝肉好大粒。芝士千島醬(?)燒過後鹹香味極濃郁，上面仲有魚籽，尼個係心機之作，必叫。
芝士燒天火蠔($68)，又係另一個必叫燒物，外層大量半溶芝士，燒蠔超重鮮味，完全唔腥，仲要好飽滿。個芝士醬汁超濃烈，揀燒海鮮一定冇錯。
煙肉車尼茄串($26)，電子menu上既新燒物，車尼茄一咬好甜多汁，煙肉燒熱後油脂逼出黎，更脆，估唔到又幾夾。
露筍豚肉串($28)，露筍軟身，豚肉燒完帶d焦脆。鹽燒雞中翼($24)，已開邊，方便食。雞翼雞皮香口，肉唔會乾，加檸檬汁更加清爽又唔會膩。
炸雞軟骨($24)，估唔到一客都有咁多粒，粒粒都大而脆口，配美乃滋更適合當下酒菜。放耐左食，都一樣脆。
野菜天婦羅($68)，炸皮薄，完全唔覺得油淰淰。野菜中，冬菇超香口，炸完都軟身，仲juicy。番薯甜而不膩，提供既天婦羅汁熱騰騰，配搭一齊食感覺唔heavy，又提味添。
鰻魚茶漬飯($28)，粒粒鰻魚厚肉，冇骨，數量仲唔少，啖啖都食到。昆布湯底好好飲，熱辣辣，清甜。醃蘿蔔爽口，鍾意可以落埋wasabi。最後食，d飯吸哂d湯，jeng。
焦糖燒菠蘿($32)，焦糖燒熔，菠蘿超級甜又多汁，冇渣，一口放入口好滿足。
水蜜桃乳酸梳打($38)，中和一下食完咁多燒物。飲品唔會過甜，乳酸味濃郁。
前菜($12)，番茄冰震，醃製後酸甜，看似簡單但又用心製作。
整體，每碟菜既擺盤都有心思，其中有塊染色蓮藕片，鮮明之餘，口感爽。而且侍應有禮，用心待食客。重點，好低食，又足料。讚。入夜之後，就愈黎愈多人飲酒食下串燒添。
