川味辣蟹·串燒·烤魚·雞煲·專門店 (已結業)

燒帶子$76用咗蒜蓉粉絲去燒，帶子同蒜蓉嘅香味沈晒落去啲粉絲度，淨係粉絲都好好食，帶子有我手掌咁大隻，燒嘅火候都拿捏得幾好，帶子仍然保持個濕度。迷你酸辣粉$15雖然叫做迷你，但份量其實幾多，湯底味道偏鹹，但係用咗我最鍾意嘅闊版紅薯粉，紅薯粉非常彈牙煙韌，味道偏辣，食完之後嘴唇有好麻嘅感覺。川味海蜇手撕雞$68用咗好多海蜇同埋青瓜，去中和嗰個辣度，有青瓜嘅關係所以食落都出奇地清新，唔會覺得好油膩，同埋好鍾意佢啲雞已經去晒皮，食落健康啲，而且啖啖肉。燒油花牛舌心$40牛舌燒得啱啱好一啲都唔老，好容易咬開，而且有好濃郁嘅牛味，睇到面頭嘅油花，再配埋黑椒等等嘅調味料，略嫌份量比較少。燒雞軟骨$36雞軟骨唔知係咪加咗孜然粉嘅味道，令到成件事更加惹味，而且每一粒都骨肉份量平衡，份量亦都唔少，燒物做得幾出色。燒明太子雞翼$38明太子雞翼脹卜卜，睇落已經賣相好好，咬開裏面嘅明太子蜂擁而出，有明太子小小嘅辣味，同雞翼非常之夾，外皮用咗蜜糖去燒，令到個味道更加平衡。兩個人食咗$320。