肚餓了串燒烤焗專門店

最近係尖沙咀做野，今晚經過附近所以黎試吓呢間。鋪面唔算好大，所以黎之前要先book位啦，唔係就好似我咁要等下先入得。

今晚唔算話好肚餓，所以食咗少少咋。首先梗係要試吓我最愛嘅牛舌啦，呢度嘅燒牛舌大大嚿，咬落去唔會太硬夠爽口，

奬勵下自己食隻蒜蓉開邊蝦，蒜蓉燒得好香，蝦亦都夠新鮮彈牙。不過如果隻蝦再大隻啲就好啦哈哈。

牛油焗雜菇亦都係我燒烤嘅至愛之一，呢度份量尚算大份，而且有唔同嘅菇類，食得過癮。

呢度價錢唔算貴，同朋友小斟一杯都算係忙碌中一種享受。