Oyster Princess (已結業)

行完outlet食個午飯，杏花邨商場入面嘅餐廳大部份都係連鎖經營，不過最近新開一間日本餐廳，一於試下。餐廳串燒、壽司、海鮮、丼集於一身，壽司方面我哋叫咗四款。壽司飯醋味適中，左口魚裙邊壽司有淡淡魚油感，至於蒲燒鰻魚壽司口感軟嫩。甜蝦壽司口感唔黏糊糊，幾爽口。最後係期待已久既拖羅壽司。有少少筋，不過油香味重，口感細滑，食完好滿足。串燒方面，雞翼大大隻而且厚肉，外表香脆。雖然有少少燶，但整體味道不錯。鹽燒牛脷心係厚切，充滿肉汁，而且爽口。至於雞軟骨，香脆之外帶有嚼勁。翠肉瓜1串有3塊，每塊又大片又juicy，非常出色。至尊海鮮盤可謂應有盡有，包括生蠔、帆立貝、海蝦、蜆同螺。蠔非常肥美，完全冇腥味。帆立貝size非常大。海蝦鮮甜無比，肉質彈牙。鮑魚有驚喜，本身醃製過，所以味道帶鹹味，凍食更但突顯鮮味。最後就係馬糞海膽，我朋友係海膽fans，所以讓俾佢食，朋友三扒兩撥就食晒，應該好出色，有啲後悔冇食一兩啖。