糖佰府 (已結業)

這晚在附近的泰國士多店買完東西後，還不算很肚餓，本來打算吃點小食，可是逛了整條街，發現好像餐廳比較多，我一個人卻反而很難叫餸。行下行下，剛好俾我見到糖佰府呢間甜品店，心諗不如甜品當正餐好了。舖頭雖然細細，但都好光猛和企理。入去既時候係晚飯時間，店舖無乜人，於是牆上的合照便更為顯眼，原來這裡有不少名人曾經到訪過，例如影視紅星馬浚偉。除了傳統中式甜品，呢度都提供好多具特色的甜品，好像雜苺窩夫、成個盆栽咁款的 Tiramisu 等。但可惜呢晚我無乜胃口，咁我剩係叫了士多啤梨雪糕豆腐花 ($34)。呢杯士多啤梨雪糕豆腐花賣相好靚啊！甜品杯的形狀好特別，士多啤梨紅和白色拼在一起，色彩顯得很鮮艷。士多啤梨、雲呢嗱雪糕加豆腐花，係一個幾特別的中西 fusion 甜品。本來豆腐花味道太淡，但加埋啖啖士多啤梨肉和士多啤梨醬混合在糖水入面，仲有雲呢嗱雪糕的甜味，溝埋清淡的豆腐花，味道意外地好夾喎。呢杯甜品 mix 左咁多野，三種味道交替著，味道甜甜地而不會過火。士多啤梨糖水都撈左少少碎冰，凍凍地，夠晒消暑，唔錯啊。