見佢門面乾淨企理，標榜住食物是由中環製造的，叫咗啲外賣打包。
店員態度殷勤，送餐速度快，聽他說隔離有自設廠房，所以點心每日都由師傅手工新鮮製作。
鮮蝦餃
果然皮薄餡靚，蝦大隻爽口。蝦餃皮唔會黐牙。
蟹皇蒸燒賣
超巨型，除咗有蝦豬肉仲有蟹籽。
鮮蝦滑腸粉
共有三條，每條有兩隻大蝦，腸粉皮不過不失，雖然未做到晶瑩剔透。已算合格。
鮮蝦腐皮卷
包裝見心思，用鋁膜袋包好，盡量保溫，腐皮卷如果唔係即刻食當然冇咁香脆，不過材料實在豐富，除咗有蝦，豬肉，仲有菜、西芹做餡料。
叉燒焗餐包
餐包做到好鬆化，外面甜甜的裏面鹹鹹的感覺唔錯，叉燒餡料啱啱好不多不少。
咖喱魷魚
不過不失，不算太淋身，有少少趙口。
懷舊雞包仔
出邊比較少食到，除咗雞肉，仲有啲薑蔥和少許菜，真係有懷舊的味道。
香芒奶皇卷
食返個甜品，芒果香濃而且新鮮，外面的皮好煙韌，加咗少許椰絲好香口，兩樣夾雜着一起吃十分不錯。
