Beirut (已結業)

社交距離措施放寬之後，蘭桂坊愈來愈熱鬧，係時候又去考察下，今日揀咗Beirut 呢間地中海菜試下～首先梗係叫番兩杯嘢飲，我叫左杯whisky sour，橙味重之餘甜中帶苦，味道balance。朋友叫咗比利時啤酒，比起一般啤酒麥味偏重。我哋先叫咗黎巴嫩沙律薄脆沙律，地中海式沙律汁味道較酸，加入咗薄荷，味道格外清新，配合脆脆哋嘅烤中東包，非常開胃。主菜摩洛哥烤紐西蘭羊架配石榴汁、薯蓉及彩虹甘筍。羊架烤到有少少焦香，並加咗黑椒同香草調味，味道唔騷亦十分吸引。配菜亦有好多蔬菜薯蓉，輕輕烤過同調味，健康之餘亦好好食。朋友叫咗煙雞柳雜菜蒜香醬烤餅卷配薯條，蒜香醬好惹味，點薯條食都食到停唔到口。餅卷皮厚度適中，烤雞亦夠juicy，仲有少少菜，口感唔會太dry。