今次同朋友嚟試下佢地午市嘅12道菜套餐，坐係席前欣賞日本師傅精湛嘅烹調手法處理每道和牛料理，享受到一場藝術級嘅盛宴！
開始前師傅介紹分別來自日本宮崎縣及鹿兒島嘅和牛，分別會用嚟整西冷及壽司，肉質睇落都知正！
🌟和牛割烹料理 $1280 (另收加一服務費)🌟
｜昆布漬和牛刺身伴菊花芡、海膽、山葵
和牛刺身肉質軟腍，牛香滿滿，配上日本海膽、山葵及菊花芡汁，味道清新開胃
｜炭燒和牛伴秋茄子、和風醋汁、茗荷、白蔥、紫蘇、莧菜
日本師傅即場用炭燒和牛，和牛入口即化，牛味香濃，連埋清甜嘅茄子一齊食，中和返和牛嘅油脂香，提升鮮味
｜藁燒和牛牛舌伴山葵、柚子胡椒
日本師傅即場用禾稈草燒和牛牛舌，牛舌來自鹿兒島，色澤粉嫩，入口軟腍，扎實得嚟有彈性，加埋柚子胡椒食，提升味覺更中和油脂，好有層次
｜和牛伴松茸、葛切、酢橘
係一種湯，充滿日本酢橘嘅水果酸香，用日本天然水，加埋和牛及葛切粉飲落去，非常開胃。師傅上菜時更會係湯蓋上面用水壺噴水，原來係日本戰國時期嘅傳統，只會招待貴賓先會咁做，代表可以安全飲用
｜吉列和牛菲力三文治伴自家製奈良漬他他醬、自家製醬汁
和牛肉味香濃，而且幾有咬口。日本師傅即場用炭燒過麵包，配埋店家自製嘅醬汁食 ，麵包脆口之餘，再食到和牛嘅香濃肉汁衝擊，味道及口感皆為驚豔，不愧係奈良最出名嘅三文治
｜和牛里脊肉他他伴醃黃蘿蔔、海苔壽司
日本師傅即場手剁和牛，將和牛切成粒，紫菜更用炭火微微燒過，份量亦頗多，食落因為有醃黃蘿蔔嘅關係，更有咬口及多層口感
｜奈良縣梨拌木綿豆腐、馬斯卡彭乳酪、紫蘇花穗
用奈良梨、以芝士及豆腐做source，梨嘅清甜加埋芝士及豆腐嘅香滑，清一清味蕾真係一個好選擇
｜炭燒熟成和牛西冷、炭燒紅椒、新鮮黑胡椒鹽漬、結晶鹽
熟成兩個月嘅宮崎縣和牛西冷肉質非常有彈性，邊位係滿滿嘅炭燒香味，沾上黑胡椒及結晶鹽入口，味道更濃郁，肉味更出
｜和牛里脊肉伴松茸壽喜燒
和牛里脊肉油花豐厚，肉質細膩，松茸鮮甜，味道又甜又香，夠晒濃郁
｜土鍋炊飯、漬物
米飯粒粒分明，米香味十足，配埋壽喜燒汁及日本蛋黃食，非常滿足
｜和牛咖喱飯 或 和牛肉醬意粉 或 和牛丼
我選擇左和牛丼，和牛配埋醬汁及米飯食，口感順滑
｜自家製Gelato
雲呢拿Gelato口感綿滑，配埋鮮甜嘅日本青提，為呢場盛宴寫上完美句號
