為食龍 (已結業)

喺銅鑼灣嘅大熱外賣腐皮壽司店搬咗嚟中環，呢次行開附近特意再去試一試。佢哋沿用銅鑼灣店嘅恐龍標誌，裝修走森林風格，亦用咗落地玻璃窗之外，仲有霓虹燈，燈箱等等，好多不同嘅打卡位。呢度嘅爆餡腐皮壽司非常有名，佢哋嘅腐皮嚟自日本，而且全部都用上高湯浸泡，令腐皮嘅甜度降低之餘，仲可以突出餡料中海鮮嘅鮮味。佢哋嘅飯就用咗秋田小町嘅米，口感軟糯。而我哋呢次就叫咗五件分別係：明太子芝士蛋黃三文魚，炙蟹膏厚燒玉子，芝士蟹籽厚燒玉子，炙燒檸汁帶子，炙燒沙律甜蝦。明太子芝士蛋黃三文魚調味得宜，仍然食得到三文魚嘅魚味。蟹膏鮮味之餘仲有咸香味，同玉子腐皮嘅甜味有好強烈嘅對比。蟹籽份量都幾多，為壽司增添不少嘅口感。帶子加咗檸檬汁，令到帶子嘅鮮甜味更加突出。甜蝦經過炙燒，為鮮甜嘅蝦肉添上一份焦香味。特濃芝士雞肉烏冬：烏冬口感彈牙爽滑，佢哋嘅芝士汁好濃好Creamy，每條嘅烏冬都掛滿芝士汁，勁好味。奶蓋白玉烏龍：奶蓋好綿密，奶香味十足，烏龍茶亦都滿滿茶香，而表面仲有串煙韌軟糯嘅白玉串，浸埋落奶蓋一齊食，味道會更加好。