沁沁麫 (已結業)

經開西灣河唔知食咩好見到新開咗間「沁沁麵」就入去試下。可能新開張入到去只有一個客食緊。幾位員工都好nice服務亦好好。見到個餐牌淨麵$39嚇咗一跳，不過入咗去坐就廢事走，（唔知有冇關係：與此同時有一枱啱啱入嚟嘅客未叫野就走咗）。於是揀咗「沁沁麵」再加祕製肉丸、咸豬腩肉同特大冬菇三樣餸。湯：等咗一陣就有得食，一碗麵嘅靈魂在於個湯，而間野亦標謗「人參湯」。原本以為味道會同韓國人蔘雞湯相似，點知完全唔同。有陣陣嘅酸味，隱約有少少人參嘅味道，但完全唔濃，雖然稱不上難飲不過如果作為招牌主打就真係令我失望。唯一可以稱讚嘅係完全飲唔到味精嘅味道。麵：試完湯再試吓麵，「哇X」碗麵由上枱到擺落口唔夠半分鐘，竟然可以淋得咁交關，就算啲牙甩晒食依碗麵都唔會有問題，真係完全接受唔到。由於個湯較稀，所以個麵掛唔到湯。人蔘湯同上海麵兩樣野又九唔搭八，食咗幾啖已經有想放棄嘅感覺。肉丸：肉丸嘅質地比較鬆散，用筷子一夾已經散開兩半。食落去好似丸狀嘅蒸肉餅咁，不過不失，不過攞嚟餸麵就有啲奇怪。咸豬腩肉：冇乜特別，唔會留下深刻印象。大冬菇：全間舖唯一值得推介，夠晒大隻，好飽肚。略嫌唔夠入味。