花漾 (已結業)

見到時代廣場6樓開咗間食肆, 諗住用埋啲coupon, 去試一試 . 雖然呢排開咗好多間星馬菜, 但其實自己都好鍾意. 夜晚八點去到, 好多人排隊 . 撳完飛仔用Gulu嗰個app 可以睇到幾多號, 行下街睇到近啲號數先至返嚟. 卒之九點十分可以入座. 叫咗杯凍奶茶Tea Terik 飲落去完全冇茶味, 好似杯奶咁, 已經覺得有少少中伏. 間鋪頭好忙碌, 啲侍應都做得好辛苦. 整體嚟講啲食物唔夠熱 , 都唔夠香口. 馬來西亞炒貴刁完全冇鑊氣 , 啲粉有啲黐埋, 唔夠黑豉油. 個麥片蝦更加唔掂, 啲蝦入面凍凍地 , 完全唔脆 食完兩嚿真係唔想再食. 唯一馬來咖哩雞的味道唔錯, 碗白飯反而又熱又淋又香, 係全晚最好食嘅一樣嘢. 同埋馬來西亞芽菜啲味道唔錯. 我開始懷疑呢間餐廳嘅食物係唔係喺呢個餐廳入面煮, 而係喺外面工場做完攞返入嚟翻熱. 最令我哋反感, 就係食食下九點幾 , 有個員工推著一大桶垃圾由廚房走出正門, 最慘就係前後去咗三次. 經過曬啲食物, 有啲唔係好衛生. 雖然位置好好 , 裝修都算唔錯, 但係咁嘅價錢嘅東南亞菜, 我真係唔會考慮再返去. 行多兩步去隔離Asam算吧