炯記餐室 (沙咀道) (已改名) 查看

朋友曾經介紹過呢間撈麵小店，我好鍾意食撈麵，今日喺荃灣，就特登行過去食午餐。叫咗「雞絲豬手撈粗」，眨吓眼就嚟到。店家話係用鵝油➕秘製醬油撈粗麵，不過我分唔到係唔係鵝油，亦都聞唔到燒鵝香味😆，但總之粗麵好有油光油香，撈埋一啲醬油味道相當好；粗麵比較硬身有咬頭，啱我胃口。雞絲味道不過不失；豬手味道中上，兼煮得好軟熟。撈麵仲包一碗例湯，係粟米苦瓜湯，幾老火幾好味。熱奶茶就唔香又唔滑。兩位阿嬸店員態度同服務都麻麻地。