焰淑泰國餐廳 (已結業)

今日去銅鑼灣覓食，發現原來登龍街有唔少睇落唔錯嘅餐廳。朋友好鍾意食泰菜，所以我地就揀咗依間餐廳。唔知係咪最近開先有依個優惠，但逢星期一至日都有兩款菜做半價都幾掋食。而且中午出面有半自助形式嘅bar，可惜我地食晚餐冇機會食到。今次食咗推介嘅鮮蝦炒金邊粉($98)。賣相唔錯。有薄薄嘅蛋網住金邊粉，旁邊有辣椒粉同花生粒。金邊粉炒得好入味，而且好足料呀。另外叫咗個特色小食拼盤($128)。都幾大碟，有炸蝦餅、炸魚餅、沙嗲串同特色春卷。分量足夠兩個人分享。其中炸蝦餅同炸魚餅做得好出色。炸蝦餅個炸皮唔厚，蝦肉彈牙，好有手打嘅感覺。而我就最鍾意食魚餅，佢好有香茅同魚嘅香味。沙嗲串不過不失。個特色春卷可能我哋擺耐咗個皮就唔脆了，但入面嘅餡都塞得好脹卜卜。拼盤連埋沙嗲醬同泰式辣醬一齊上，不過我哋覺得都夠鹹就無點。辣汁豬頸肉沙律($88)。所謂沙律其實係生菜，餐廳比咗好多豬頸肉我哋，雖然就咁食可能會有啲鹹，但包埋生菜就覺得都幾好食。豬頸肉調味好足，咸咸地微酸，香料味濃，幾有泰國味道。朋友叫咗個聖獅梳打水($22)。我嘅凍泰式奶茶($22)有泰式奶茶嘅茶香，但就唔會好似泰國嗰啲咁甜，正合我意。