上海廳1930 (已結業)

一家人去完黃大仙廟拜神，行入北館搵嘢食。見到間上海菜館，裝修都幾好，有懷舊嘅感覺， 門前仲放咗一個素食菜單。今次有老有嫩，望落都好啱食，就行入去試下，叫咗幾個傳統嘅上海菜。第一次幫襯，唔知等幾耐先有得食，就叫個冷盤，食住等。青瓜拼海蜇，通常酒樓都係麻辣味，但佢用咗傳統嘅蒜香味，青瓜清爽 ，海蜇彈牙，清清淡淡，夏天食啱啱好。未食完冷盤，小籠包同生煎包已經到了。先食小籠包，小心燙傷，好熱呀! 一口一粒，滿口都是濃湯。但生煎包就比較普通，勝在包皮鬆軟。要讚下呢個松子菜粒炒飯，食落唔油膩，但一粒粒嘅炒飯都有少少鹹香味配上菜粒，偶然食到松子，令味蕾有一番新感覺。松子魚、雲吞雞到上海舖都會食。松子魚睇見好多汁，但炸得好鬆脆，好彩多配菜，家中長者好鍾意，夾下夾下，酸甜味適中。雲吞雞有半隻雞，而且好新鮮，食落有雞味 ; 雲吞細細粒加上濃湯配搭，令人食過不停。食埋甜品就是完美的一餐，我今次叫左個香蕉高力豆沙，真係唔錯 香蕉味濃郁，豆沙餡清淡，好食。