目利きの銀次Royal Grill (已結業)

朋友係要見既，本來約左老友去太子食德國豬手嘅。點知去到餐廳，侍應告知全晚Full booking。之後我地即刻轉移陣地，行左去新世紀。老友行過呢間餐廳時話平時好多人排隊，難得今日冇人不如去試吓啦！我都鐘意食日本野梗係冇反對啦！      因為之後諗住落旺角食甜品，所以兩個人只係嗌左三樣野。       第一樣係豚肉烏冬，先講湯底，湯底好鮮甜，好濃，加埋蔥花，好味！最重要係，飲完湯完全唔覺得口渴。至於豚肉，非常鞋口，又韌又冇肉味。平時係凍肉鋪買翻屋企打邊爐既豬肉片仲正過佢。至於烏冬，非常普通，食落同一般急凍差唔多，個人認為煮很太過㝝。        第二樣叫既係明太子炭火燒飯團，呢個食落好特別，食落好香脆，味道焦焦地，同明太子既味好夾。但果種香味同質感比起煲仔飲既飯焦仲有段距離。老友話個飯團凍左少少食，個外皮好硬好韌，好似食香口膠咁。         第三樣係呢間餐廳既招牌，豚肉燒餅。個燒餅個份量都算幾大。但味道真係麻麻，椰菜同粉既比例唔太夾，啖啖都係椰菜，食多幾啖都食到口寡寡。塊䐁肉依然係同烏冬既䐁肉一樣又鞋又冇肉味。