百樂小館 (已結業)

銅鑼灣百樂潮州呢間老店都常去，但原來尖沙咀都有間姊妹店叫百樂小館。今晚就在這間裝修較新嘅飯店為朋友慶生。先嚟一個五香炸芋絲卷，炸得香口鬆脆，又唔散，一條條粗芋頭，食得回味。第二碟滷水鵝肉拼盤，每款夾了一件，墨魚彈牙，豆腐香滑入味，鵝肉嫩滑冇渣，腩肉雖看落有層肥膏，但食落唔覺油膩，感覺似補充骨膠原。再來便是每次去銅鑼灣店都一定要點嘅蝦棗同蟹棗。相當有水準，香甜鮮味又鬆脆，還能見到蟹肉，真材實料。呢個虫草花群翅邊燉雞湯又係唔錯，湯料足，湯冇咩油，清甜好味，忍唔著飲咗2碗欖菜四季豆炒得相當有火候，欖菜甘甜香口，四季豆腍軟得來有咬口，送飯一流。重頭戲係 糯米炒肉蟹。肉蟹夠大隻，肉質鮮甜，墊底嘅糯米沾上蟹嘅鮮味，真美味。已經飽飽哋，焚化爐級朋友還要再來一個糖醋伊麵。麵餅煎得相當脆口，雖然有少少油，但加咗啲醋同糖去中和返，少咗D油膩，就少埋罪疚感。最驚喜嘅居然係壓軸甜品 = 杏汁蛋白芋泥。食開銀杏芋泥，用豬油搓，係好食，但好少朋友願意分享，所以通常我一個人食大半碗，好鬼罪咎。但今次加咗杏汁蛋白撈埋，成件事即刻唔同晒，唔會'溜'，杏汁淡香，蛋白好滑，中和晒芋泥嘅油膩，成件事好夾。真後悔分咗小半比人。