豹茶 (已結業)

本小姐又試黑糖珍珠鮮奶喇...今日又試邊間呢?身處花園街又見口渴,見到豹茶冇乜人,即管膽粗粗埋去柯打咗杯<豹子雪>睇吓味道如何? 相信豹茶同BOVE其實係同一間店嚟,本來呢度就只係賣雞蛋仔only,係前排呢個黑糖珍珠鮮奶熱潮爆發出嚟之後,呢度就唔執輸,延伸多一間小舖位置出嚟賣台式飲品加入戰團...不過試過之後,我都幾乎可以肯定呢度將會慘敗...... 店舖雖然已經花咗小小心思去為台式飲品起咗啲好得意嘅名稱,好似呢杯黑糖珍珠鮮奶就叫做<豹子雪>咁,其實真係聯想唔同兩者有乜嘢關係(?!)佢哋售價$26蚊一杯亦都比起幾家品牌平幾蚊,賣相亦似乎差不多,一樣可以有豹紋嘅黑糖效果,冇人排隊......基本上都係俾完錢幾分鐘之後就有得飲~拎上手之後搖勻飲用......好後悔!黑糖真係過甜...完完全全蓋過哂鮮奶嘅味道,真係非常可惜珍珠口感亦都令人難受,毫無Q彈之感又唔煙韌......唉