牛大人台灣火鍋吃到飽 (鱷魚恤中心)

营业中

休息中

台灣師傅親自主理既牛大人主打台式地道火鍋。基本上可以話佢哋每一個湯底都有佢哋個特色，我就嗌左佢地嘅藥膳湯底同埋大蒜雞湯真係好好味，小編真係極力推薦你地去試下佢地嘅藥膳湯底。-限時120分鐘任飲任食，真係老實講你真係會抱住個肚走，除非你真係會去牛大人個度節食不過我相信你都無咁癲。飲料方面，首先真係好多台灣本地嘅特色飲品，同埋佢地自己整埋冷泡茶咁用心點搞啊，小編好鍾意佢地嘅白桃烏龍，淡淡嘅白桃味道只係有小小嘅甜味，啱晒打邊爐呢啲重口味，可以清下你嘅口腔仔。-澳洲極上和牛套餐揀左，因為貪佢肉類嘅選擇最多，最推薦就係牛肩卷！色澤紅潤脂肪分佈均勻，放入口之後個肉味香濃持續好耐！大佬小編我真係頂唔緊。台灣打邊爐就肯定嗌鴨血、甜不辣、油炸鬼、豬血糕、黑輪等等台灣進口嘅食材啦，如果唔係我黎牛大人把鬼咩！-不過咧小編其實真係想大力讚下佢地蔬菜區，大佬每一個菜都用獨立嘅盒裝住，呢個疫情期間老實講小編食得好安心唔講經。如果你問我推唔推薦牛大人，咁肯定推薦呢個價錢呢個水準真係無乜好挑剔，都難怪點解牛大人咁多Foodie推薦，日日排隊都打晒蛇餅。