茶餐廳2.0 (已結業)

尋晚返工返夜左，屋企又無飯食，於是約左個老友去試一試荃灣愉景新城2樓既茶餐廳2.0。呢間餐廳既門口，有個專做雞蛋仔既位置，香噴噴既雞蛋仔味搞到我好鬼肚餓！等左5分鐘左右就有位，入到去，間餐廳都算闊落，都算幾舒服。我同個老友揀左個卡位坐，一坐得就有人招呼，我個老友早就揀好左個7成熟既紐西蘭肉眼牛扒，而我就揀咗個咖喱紐西蘭西冷牛扒，野飲就揀呢間舖既特色野飲，黑牛同埋黑糖珍珠奶茶。等左十分鐘左右，所有菜都黎齊，可以開餐！西冷牛扒切落去充滿肉汁，配上絕配既黑椒汁，食落去唔硬口，加上價錢唔貴，性價比非常高！而特色野飲-黑牛，原來係可樂加柯華田雪糕，從來無諗過可以咁夾！食一啖雪糕，飲一啖可樂，然後雪糕慢慢溶化，估唔到原來柯華田同可樂可以咁夾！而呢到既黑糖珍珠奶茶，茶味十足，甜度亦岩岩好，只係珍珠硬左少少。食完正餐，咁緊係要滿足我第二個胃啦！我就點左個雪糕蘋果雞蛋仔！熱辣辣既雞蛋仔，加上雪糕，仲有蘋果干做配搭，非常好味！中意食甜品既話你實鍾意！不過呢個甜品都幾大份，記得食得晒先好叫丫！好滿足既一餐，有湯有扒有甜品有野飲，一次滿足三個願望都係每人百幾蚊，抵食丫！