茶餐廳2.0 (已結業)

收工同同事去咗愉景新城買野，行到咁上下大家都肚餓，又想鋸扒，但又唔想食得太貴，經過見到有間茶餐廳，估唔到高檔商場都有茶餐廳，就入去試一試。一入到去，店員都幾有禮貌安排位置，揭開牌就梗係即刻睇下有無鐵板餐啦，點知無，但見到有個石燒系列好似幾特點咁，就每人點一個滿下鋸扒嘅願望。T骨扒：塊扒大過我塊面，我叫咗6成熟，可能近骨位，都幾有牛味，黑椒汁又夠惹味，大大塊都幾抵食。厚切豬扒：我同事點嘅，佢切咗一舊俾我食，以為塊扒咁厚會鞋口啦，點知肉質又幾鬆化，配上重口味嘅蒜蓉汁都幾夾下，我覺得豬扒比牛扒更出色。本身諗住鋸完扒再食雞蛋仔配雪糕，但食完真係太飽所以無點到，下次再嚟一定會試下。