老夫子餐館 (已結業)

同友人去深水埗尋寶，返出去旺角時經過老夫子餐廳，有小小餓，於是上去食個下午茶。間餐廳係2樓，上到去就會有老夫子同大蕃薯既公仔俾人影相。我地入到去見到個waiter,同佢講“唔該兩位”，佢居然叫我地出番去等叫飛，同佢講係門口都冇人俾飛喎，佢先俾左張飛我地。等左10分鐘先有得入坐，仲要係搭枱。話晒係主題餐廳，餐廳裡面所有裝修佈置都係好有老夫子漫畫feel, 近門口有部車車好靚，我都好想去影張相，但係有d小朋友係車上玩緊，我都係用眼睛欣賞算啦：）之前都有聽聞d野食既名都好別出心裁，令人會心微笑，打開menu一睇，果然聞名不如見面，究竟點樣起到呢d名架 XD因為之後又有飯局，驚食太多，所以剩係點左炸魚薯條和台式鹽酥雞。食物都幾快黎到，但係一食落去就笑唔出啦。鹽酥雞一d台式既味道都冇，只係無味炸雞柳，仲要係肉唔好食添，薯條係番炸，好油又好硬，魚柳尚算係正常可入口。最後我地係食唔晒（食唔落），其實炸野通常點整都唔會難食，間餐廳真係“不可思議”地難食，的確係中伏了。