Kimbap Gallery (已結業)

呢排唔知做乜，經常去到想去嘅餐廳門口，先發覺已經結咗業，唯有去附近睇下有咩其他嘢食，最後來到呢間 Kimbap Gallery。午餐由四十至六十幾蚊不等，加5蚊有飲品，尚算抵食。落單後好快店員就送上前菜及餐湯，泡菜辛辣爽口，相當開胃，餐湯係南瓜湯，有大量南瓜蓉，食完辣泡菜後，飲返個甜甜地嘅南瓜湯可以中和返下。今日叫咗鐵板烤牛肉飯，上檯時熱辣辣，香氣十足，牛肉醃得入味，份量亦多，配菜嘅椰菜鮮甜，有點美中不足嘅係唔太夠汁，飯有點乾，建議可以加多少少汁，同埋主動提供韓式辣醬，咁就更惹味啦。