茶餐廳2.0 (已結業)

今天又同家姐去荃灣探舊鄰居，傾下傾下，舊鄰居的小朋友叫肚餓，原來已經十二點有多，就一起落樓下食D嘢，鄰居話近近地去茶餐廳2.0，我地無乜所謂，去到都好多人喎，門口更有雞蛋仔賣，等左不到5分鐘就有位了。坐位雖然有點密，但都叫舒服，先叫野食，我叫左一個蒜香扒大蝦卡邦尼意大利粉、家姐叫左個全日早餐，舊鄰居叫左一個兒童餐比小朋友，他說自己今早食左糭仲飽，而且呢度D兒童餐好大份，他同小朋友share 食可以了。食物好快送上，兒童餐的確幾足份量，有一碗卡邦尼意粉，炸薯條，牛油粟米、橙汁！最特別係有幾粒雞蛋仔，雞蛋仔同薯條都幾好食，點解我的知，因為我偷食左D！全日早餐亦好豐富，有豬肉腸，火腿、煙肉、茄汁豆，仲有件牛油法包，家姐話樣樣都幾好，煙肉唔太肥、豬肉腸肉香多汁。我卡邦尼大蝦意粉，煙肉香，汁濃香滑，最出色是那隻蝦，呢度選用大頭蝦，都叫大隻，蝦頭充滿蝦黃，焗香，非常香惹味！蝦身用蒜泥焗，好好食！最後再叫左個雪糕配心太軟比小朋友食，擺碟美觀，逗得她非常開心～！滿足！本來想起門囗買個雞蛋仔食，但太飽了，留待下次罷！