荔香園冰室 (已結業)

有時一個人食飯諗唔到食乜，最方便就係茶餐廳，貪佢乜都有又夠快。當日去開旺角要食晚飯，經過間茶餐廳好唔似旺角，因為佢哋嘅裝修好新穎，坦白講，我比佢嘅裝修吸引咗入去。見到餐牌，真係乜都有，連四川菜都有，雖然感覺好唔茶餐廳，我都叫咗個水煮魚試吓。嘢食嚟到，果然唔係一間普通茶記，首先個水煮魚有heart啦，用煲仔上，可以保持住溫度，因為水煮魚呢樣菜本身多油，如果一凍好易變得唔好食，所以依個位都幾好。雖然只係普通嘅飯，但係佢個碗真係好靚，好match依間茶記有心思嘅裝修，一個普通客飯都令我幾驚喜。再講味道，首先我唔會預佢嘅水煮魚好似川菜館咁咁正宗啦，但依個魚一啲都唔失禮，夠香夠麻，辣度都係正常香港人食開嘅，配菜好足，咸酸菜都好夠正，最重要係佢大大份，啲魚滑而且好似食極都仲有咁，咁先係茶記嫁嘛，大大份夠飽肚。另外仲叫多咗個浸菜，本身諗住求其雞湯浸啦，但佢係用好似有啲豆漿味嘅湯底去浸，夠味之除又唔會浸得太淋，依個都係我意想不到嘅。整體嚟講，依間茶記食物都有水準，但我最欣賞係佢成個裝修同格局，令到我覺得好有feel，而且餐具都好有心思，下次我經過都會入嚟再試其他嘢！