蜀府川鍋 (已結業)

講起油塘淨係識有大本型呢個商場，原來行過對面工廠大廈有間火鍋幾有特色，門口仲有好多魚缸放住新鮮生猛既海鮮。尖椒重慶皮蛋，呢個黃金皮蛋比平時既皮蛋好食，仲要係溏心既，加埋佢地既重慶辣汁好惹味，值得一試既前菜。泡椒尖筍，我第一次食尖筍，好怕佢果陣味，但呢個幾容易接受，不過唔好睇佢冇紅色，其實仲辣過重慶皮蛋好多。蒸氣海鮮餐，包海鮮拼盤同一條魚，拼盤超級豐富，有蒜蓉開邊龍蝦、果皮蒸鮑魚、大蜆、蒜蓉粉絲帶子同粟米，其實好似係四人份量但我地兩個海鮮怪都一樣清晒，海鮮洗得乾淨，鮑魚新鮮到仲郁緊。厚條龍躉，我就唔太好魚既，不過朋友話肉質好嫩滑鮮甜，佢自己食晒成條就知應該唔錯。就係呢個兩用鍋喇，上層蒸下層烚，一次過滿足晒你兩個願望啊！不過下次會叫返d肉類同丸可以烚下，因為今次食海鮮都係主要用上層清蒸，保留返原汁原味。