韓樂 (海之戀商場)

营业中

休息中

之前無聊同屋企人天水圍天澤個邊食過韓樂既早餐，其實都算唔錯。市道艱難，最近轉左新工，去左荃灣個邊番工。發現海之戀既地下又有間韓樂，因為要慳錢朝早平時經過都唔會食。今日番工冇拉拉勁大雨，又冇帶雨傘，見走唔到，於是就入左韓樂食番個早餐。入到去好多英文同韓文字，係韓國既風格。佈置令過天水圍天澤個間。一入正門有一個收銀處，然後左右兩邊有條大直路比你入去。疫情關係，店員會悉心為你探熱，完成後就帶你入座，座位同座位之間都好有心咁，用膠板去分隔一點五米距離，而且膠板上面重好細心咁寫哂防疫字句，提醒客人時時刻刻分分秒秒都要有防疫既意識。個膠板唔會影響餐廳既風格，和而不同既效果。睇左陣餐牌，叫店員落單，見到有我中意食既溫泉蛋同蕃茄湯，就叫左了。唔洗10分鐘，我叫既蕃茄濃湯溫泉蛋扁意粉就黎左了。濃湯上有一顆顆既蕃茄微粒，唔會熟過龍既溫泉蛋，上面重有幾令仔既蔥花仔﹐加幾條既薑絲。天氣太熱叫左杯凍咖啡少田少雪，味道岩岩好，聽聞即磨咖啡重好好飲先呀。呢餐早餐先至36蚊，算係咁，睇下邊日落大雨再黎食過早餐先，番工咁辛苦，隔唔中都要獎勵一下自己先先架啫。