北海道食堂 (已結業)

係沙田行街見呢間野評論幾好，入左去試，點知一坐低見到個餐牌已經冇胃口，下午茶時間只得八個選擇，老實講全部都唔太吸引，問店員有冇其他set，佢話唔啱食可以散嗌壽司刺身，咁我見價錢唔抵食就勉強揀左個泡菜豬肉丼，男朋友就揀左玉子牛肉丼，另外加左$18要左兩件三文魚腩壽司，同埋$38要三件三文魚刺身，餐飲送左柚子蜜。首先登場嘅係柚子蜜，我見到佢嘅顏色已經深感不妙，攪勻左佢都淡到好似水咁，果然送嘅冇好野，我都係飲茶算。之後上嘅係壽司同刺身，所謂嘅三文魚「腩」壽司同普通三文魚冇分別，我真係唔知佢邊忽係腩，壽司飯都唔好食，而三文魚刺身嘅質素同size都同某間碟碟$8嘅壽司店差唔多，比左$38嘅我覺得自己好似水魚。😀最後係兩個飯丼，泡菜豬肉丼成碗得五塊豬肉，啲肉除咗咸之外食唔到其他味，啲「泡菜」仲離譜，明明就係雜菜，扮乜野泡菜呀？全部都勁難食，特別係椰菜淨係得陣草青味，我極度懷疑呢間野唔知咩係泡菜。呢兜野廿蚊都比多佢😀玉子牛肉丼算係咁多野入面較正路，不過總括嚟講呢間野嘅下午茶真係不可一不可再。