上環嘅舖頭係樓上鋪，一入目係好有風格嘅塗鴉牆，用咗搖滾金屬主題裝修，上完樓梯轉左就會見到一架好有型嘅摩托車。店入邊有吧枱普通枱可以選擇，隨機播放唔同嘅搖滾音樂。因為今次好懶所以就叫咗配搭好嘅Mohawk Menu ($348/pp)咁就唔使煩惱揀啲乜。
當日前菜有三款，分別係枝豆、大阪燒同油甘魚刺身。枝豆係泰式辣醬風味，去咗咁多間日本餐廳都未試過呢一種風味，吸引到令我一個接一個咁食。油甘魚刺身酸辣有度，上面有啲炸過嘅藜麥，口感好有層次，開胃之餘又不失風味。
之後有韓式炸雞同TMK Kimchi Salad，柚子包菜沙律嘅醬汁調配得好好，鮮味帶酸辣，中和左韓式炸雞嘅油膩，味道互補。入邊仲有自家醃製嘅泡菜，偏甜但爽脆。主菜有蟹柳牛油果手卷、Chicken Ta Da、炸吞拿魚卷蟹柳卷，每種嘅口感都係啱啱好，炸物脆香，食完好滿足。
最後由甜品Chocomonaka作為結尾，整體黎講每個配搭都有驚喜，味道平衡得好好，相信呢個Menu係可以食到TMK嘅精華。
