呢次任食有成28款菜式以供任食，共分四大類，分別係涼菜、麵點、點心同甜品，我同媽咪大致上都食盡多達20多款，都算差唔多食齊晒! 非常滿足，真係飽到上心口添!
迷你鮮肉餛飩，每碗有2件，餡料話明係鮮肉，果然夠鮮，唔係一般的急凍肉的味，餛飩細細粒容易食:)。
香葱咸薄餅睇落係油炸已經唔多想食，食落口唔算好油，雖然香口，仲有脆脆地，唔熱，都係一般。
擔擔麵都係細細碗，一D都唔辣，配合濃湯同花生碎，肉碎份量適中，麵質可口彈牙，唔錯! :)
大白菜春卷香脆，唔熱，都係一般。
奶皇小麻球係甜點，剛剛整熱出黎，熱食可口非常，咬一啖，奶皇餡即流出黎，小麻球炸得香脆可口，讚!
呢碟涼菜有4款，包括蒜茸拍黃瓜、蒜泥白肉卷、荳腐馬蘭頭同梅菜荀三絲，4款中我比較鍾意食蒜泥白肉卷，雖然係開胃涼菜，其他都唔係太喜歡。
呢碟涼菜有係4款，包括水晶肴肉、手撕烤麩、涼拌大豆芽同本幫燻魚，水晶肴肉幾好食，塊肉唔會好肥膩，恰到好處:)。手撕烤麩咸咸地，有D似食豆付咁，好味:)! 本幫燻魚甜甜地，雖然顏色黑沉沉，食落好香口:)。我唔鍾意食涼拌大豆芽，好辣，唔掂!:(
鮮菜肉小籠包同蘇式鮮肉小籠包睇落分別唔大，只係頂部有D菜係到。鮮肉小籠包湯汁好鮮甜，鮮肉同樣地同餛飩一樣夠晒新鮮突出D鮮肉味，皮薄且冇穿，讚
。
嫩雞煨麵味雖然淡左少少，雞肉份量適中，麵質可口彈牙，都係一般啦!
棗泥糕係剛剛蒸好，熱食好味，棗濃，每人二粒，細細粒易入口，好味:)!
桂花酒釀丸子，酒味香濃，丸子係芝麻細粉湯丸，彈牙可口，糖水唔算太甜，好香:)。
糯米燒賣，剛剛蒸好熱食好味，咸度適中，始終係有糯米，比較飽肚，味道一般。
總括而言，呢個上海菜任食值得一讚，上菜快，品質好，算係任食的新嘗試~
