今日去到大角咀呢一間上海菜度食晚餐，係一間街坊私房菜小店，環境企理，位置闊落，六點幾嚟都唔算好多人，剛好有位。
店員介紹左呢期做緊嘅優惠同菜式，特別推介我哋叫而家優惠$38花膠雲吞雞湯。每蛊湯十分足料， 而且味道濃郁，雲吞大大粒，花膠爽滑，雞湯唔太油膩。
之後叫左四個菜式
上海回鍋肉
回鍋肉有上海定四川兩種口味，上海呢種會無咁辣，剛炒出黎上檯已經好香，陣陣鑊氣，雖然唔太辣，但勝在夠惹味，椰菜唔會炒得太乾身，入口爽脆。
奶油津白
食濃味嘅菜時點都要叫返碟清菜中和下，一般餐廳都好少見有奶油津白，唔係經常可以食到，所以特意叫呢個菜，呢個奶油津白娃娃菜清甜，奶油汁剛剛好，不稠不稀，啱晒送飯！
例牌口水雞
雞嘅肉質肉多又頗為嫩滑，辣度適中，味道不錯！
欖角肉碎炒飯
即叫即炒，炒飯粒粒分明，炒得入味，份量都好多！
