Holiday Cafe (已結業)

係上水估唔到都有一間環境舒服嘅Café，啱哂星期六日約朋友一齊出黎Chill下傾計。星期日去有Brunch Set，選擇多有沙律、飯麵、扒，仲有素食選擇，啱哂唔同口味需要，套餐仲包左沙牛律/餐湯，另外加一杯飲品。煙三文魚班尼迪蛋配田園沙律 $88★★★★☆班尼迪蛋三樣最重要嘅野包括英式鬆餅、 切開流心嘅水波蛋同埋濃郁荷蘭醬，呢間完全做到呢三樣野。水波蛋煮得剛好做到流心，外加濃稠少少芥末味嘅荷蘭醬，一刀切落去，蛋汁流哂出黎，加上英式口感鬆軟鬆嘅餅吸埋啲醬汁，再外加咸香煙三文魚，一絕。最有驚喜係佢中間仲有大量帶酸甜嘅紫椰菜絲，開胃之餘食落唔會太過油膩！慢煮雞胸牛油果墨西哥夾餅配酥脆薯條 $98★★★★☆墨西哥夾餅有兩大塊，口感豐富，食落味道偏向印度香料味道帶微辣。入面有芝士加牛油果，雖然用左雞胸，但一啲都唔鞋口，所有食材加埋食落好清新，一啲油膩感都冇。呢幾樣食材仲要高蛋白質，即使減緊肥都絕對啱食。玫瑰花蜜脆炸雞翼 $28★★★★☆雞翼有三隻，即叫即炸上枱仲係超級熱辣辣，做到外脆內嫩有肉汁，玫瑰花蜜係另外碟上，可以自己點多點少，點完雞翼外層有蜜糖嘅甜味，再滲少少玫瑰嘅清香，中和番雞翼嘅肥膩感