個名好盞鬼, 叫"三不館", 令我諗起九龍城寨
成日話搵機會試下, 今晚機會就黎喇
一踏入佢門口, 就好似入左時光隧道咁
就連佈置既廣告街招, 都係耳熟能詳既廣告, 再加添創意,
無論裝修,佈置, 擺設, 用具, 音樂都充滿50年代香港本土懷舊感覺
呢張就係落單紙
配料口味好廣, 除左一般傳統車仔麵都有得叫既餸之外
仲有新式d既餸, 例如:酸齋, 蝦條卷, 豬手, 鳳爪, 豬頸肉
湯底選擇都唔少, 唔加錢既都有4款任你揀
而鍾意食辣既朋友, 呢度都有2種辣味, 5個唔同辣度比你選擇添
台面上有一樽野, 我原以為係辣椒油
一開~~嘩!! 係辣菜脯呀!!!
真係估你唔到
不過不失, 唔會太甜, 至少比起有d鋪頭自己煲既好飲
我個2餸麵黎喇!!
醬燒豬頸肉--->薄切但大片, 少少爽口, 好食
滷水鮮豬腸--->大大舊, 洗得乾淨, 每一啖都食到香濃滷水味, 但如果可以再炆淋少少就perfect
油麵--->唔知係咪真係鮮製關係, 爽口架wor
有別於我平時食油麵可能會預上好淋好pat既問題
湯底--->可能我係好食得辣既人, 所以少少少辣真係無咩感覺
我食唔出辣, 我反而食到佢既香, 下次要辣d先~~可能會好正
千奇唔好睇少碗麵, 份量大到呢....好在我夠肚餓, 唔係都食唔哂
男朋友既3餸麵
陳皮魚蛋 --->預左無咩特別, 但我鍾意食, 所以係叫比我既
懷舊牛腩--->我只係食左一啖仔, 炆得好淋, 夠鬆軟
炸魚皮---> 不得了, 一碗咁上! 魚皮又夠鬆化, 勁抵食既一個餸
湯底--->反而呢個既少少少辣麻度岩岩好, 好開胃, 有時太麻會搞到食龍肉都不知其味
呢間三不館除左裝修佈置有花心思, 食物有用心製作, 就連老闆&員工都慇懃有禮
就響我地坐低無耐, 老闆見我地都孭住背囊,
響現場都爆爆地客時, 都去拎多一張櫈埋黎比我地放低背囊, 等我地食得舒服d
而員工無論接單, 上菜, 清理時都好有禮貌, 有別於一般小店員工"打份工"既態度
總結: 呢間係管環境氣氛, 管食物質素, 管服務態度既三不館, 我絕對推介
