公和荳品廠 (已結業)

葵廣係個每次去都會遇到新鮮感嘅地方，但我唔係經常流連嗰邊，喺網上見有人分享，原來呢邊嘅公和荳品廠有芋圓出品。好奇心驅使，罕有地跟跟風。係人都知公和好耐歷史，呢間位於葵廣2樓，一上電梯就見到，話係九龍城店嘅分店。餐牌供應豆花、豆漿，除左傳統口味，仲有紅豆、什果、士多啤梨、椰汁等配料，單拼$18，雙拼$20。三色芋圓豆花 $25用上100%荔蒲芋頭每日新鮮製造，見店員當時都係剛剛煮起芋圓豆花可選熱/暖/凍，口快快答左要暖，或多或少冇熱嘅咁好食。三色圓分別為紫薯圓、地瓜圓、芋圓，總數16粒，形狀不一。三色圓各自味道好淡好淡好淡，只有好認真咁噍，先有少少味道，以地瓜圓已經算最突出。冇加糖或者糖水煮，所以係完全唔甜。圓嘅質地唔夠煙韌，好在有啲噍頭，唔會死實實。公和出品豆香都幾重，但因為點左暖豆花，所以都係預期中冇熱豆花咁滑溜溜。