悅滿軒

因為聖誕佳節所以特登去咗饒宗頤文化館H座悦滿軒訂枱食西餐，一入到去好有聖誕氣氛，無論佈置音樂都係。 頭盤我哋點咗法國泥蟹湯同埋白酒忌廉煮青口， 個蟹湯好有蟹嘅鮮味而且用咗法國洋蔥，同埋白蘭地忌廉一齊煮，個湯好有質感好滑，而個青口配埋四塊法國多士食嗰時點埋啲白酒忌廉汁，感覺一流，另外青口雖然唔係好大隻但係有好多件，而且比平時食開大隻嗰啲鮮味好多。主盤我哋叫咗法式海鮮燴意大利飯，同埋美國安格斯肉眼扒16安士，個意大利飯入面有紅蝦、紐西蘭大蜆、同埋帶子，個大蜆真係超超超大隻，要用三個超字嚟形容，因為我之前都未食過咁大隻蜆，啲蜆肉好鮮甜超讚！另外紅蝦又係好新鮮，蝦膏超多，另外帶子係煎到金黃色啱啱好。 美國肉眼扒就唔使多講，又係好濃嘅牛味，七成熟啱啱好，外脆內軟點埋特製嘅醬汁或者加海鹽 食又係食到停唔到口。呢度嘅食品質素真係一流，而且環境啱曬情侶或家庭聚會，環境清幽絕對可以傾到計， 最啱大時大節或紀念日book枱食飯。。