一風堂 (德福廣場) (已結業)

拉麵魔又出動搵食。今次目標係一風堂。 白丸 一風堂嘅原創拉麵，原味豬骨湯底。特製版有夠豪華，有兩塊日式叉燒、兩塊日式豬柳、木耳、芽菜、竹筍、紫菜、半隻半熟蛋。湯底白滑帶淺啡嘅色水實在討好。湯底非常忌廉咪，滑不溜口，膠質甚重。豬骨味道香醇濃厚，鮮甜無比，正是介紹所講嘅濃郁溫和。湯底調味適中，又唔會過份油膩，飲多多都唔怕，絕對係終極高水準之作，正是個人最期望嘅完美湯頭。豬骨湯配上博多傳統風味嘅特幼麵條更係一絕。選擇硬麵，效果亦做到煙韌實在嘅質感，不過仍有再硬一點嘅空間。叉燒亦係高水準之作。不過個人略嫌腩肉太肥膩，普通版較為吸引。半熟蛋嘅賣相亦係完美呈現，蛋白軟滑，蛋黃色澤橙黃，呈流心啫喱狀，黏口度十足，蛋味濃郁。不過呢隻蛋未經過汁煮處理，只用最原始味道出場。一風堂的確係拉麵界嘅王者，個人極為欣賞。好多網友都會拎一風堂同豚王作比較。個人認為兩者嘅出品都係超水高準，不相伯仲。豚王嘅湯底係濃烈且豪邁，一風堂係香濃又溫和，可謂一剛一柔，兩者我都喜歡。