呼吸咖啡茶館 (已結業)

  四個女仔book咗枱一心諗住聚舊吹水。去到坐低，氣氛唔錯，係稍微覺得張櫈俾人坐得太多，而且枱同枱之間太少空位，感覺有關少少狹窄。    餐牌似雜誌形式，但係食物選擇唔多，每人一個set加drinks:叫咗燴牛尾飯同咖哩吉列豬扒飯。前菜係水果沙律伴乳酪同燕麥，老實講似甜品多d。主菜唔錯，豬扒食到最後仲脆，份量男仔亦足夠。 飲品就有特濃朱古力沙冰丶Mint chocolate丶Mocha丶香蕉奶。頭兩種朋友試過話ok;我杯Mocha就成杯朱奶咁，除咗頭幾啖有咖啡味，飲到最後仲要淨1/4杯cream。熱香蕉奶就中伏，大半杯奶泡都算，冇蕉味之外仲要有怪味。  由於我地坐多過2個鐘，又要再叫drinks，今次嘅凍芒果紅茶同熱桂花薑茶(個配㯚好似係咁)都幾好飲，屬有俾心機之選。但係個人認為咁嘅價錢實在唔抵，侍應就好有耐性同禮貌。