花壽司日本料理 (已結業)

因為呢頭除了酒樓較多選擇之外，都好似無乜特別好食的食店，而呢間位處於長沙灣運動場附近的日本料理的午市定食都算做有唔少選擇，所以以前也曾經幫襯過一兩次。這日來到附近，因為無食早餐，所以雖然未到午飯時間，已經行到肚餓，都上來食番個早lunch先返屋企。原來呢度的午餐假如在12：45前埋單，可以收少$10，而呢度的午餐絕大部分都只係$42，減左之後只係$32，仲要係唔使收加一添，都算幾抵。（可能係因為近工廠區掛）叫左個餐牌寫住好味推介的$42「日式海鮮炒飯」定食，另加$3跟杯珍珠奶茶。（因為個侍應話無普通港式奶茶喎）哈！但係檸檬茶佢又有呢！講真，杯珍珠奶茶就真係麻麻地啦，同正宗台式飲品店的差了一皮，奶茶不夠滑而帶澀。至於個炒飯雖然話係好味推介，但係味道都唔見突出，海鮮就切得好細碎，雖然都叫做有d三文魚碎、魷魚、蟹柳等，但係就甚為一般囉，係勝在叫做幾大碟咁啦，食完都幾飽嘅。最得意係食食下，有其中一個女侍應問碟飯味道是否足夠，話如果覺得淡可以加椒鹽，話因為有d客唔慣咁鹹，所以味道調校得輕左，有客人話想鹹d先後加喎，我覺得咁嘅做法又真係有d怪囉！埋單只要$35，如果單計價錢都算係幾抵嘅！