巧得鍋 (已結業)

喺工廠大廈入邊嘅火鍋店，湯底款式都好多，仲可以叫燒肉同埋刺身，可惜疫情期間刺身冇得再供應。鍾意食辣嘅我哋最後揀咗食雞煲，醬料有好多選擇，好欣賞有勁多瑤柱既XO醬，係比預想中辣。至於雞煲雖然半隻但係份量好多，而且肉質都幾滑，之前食過淨係得雞皮有味嘅雞煲，所以幾滿意佢煮得入味。食咗一半就加湯，另外嗌咗花膠鵝腸呢啲冇咁大路既餸，欣賞佢有得雙拼，所以一次過試咗蝦滑同墨魚滑，彈牙爽口有驚喜，而且花膠就算係雙拼都好大舊，所有料都好新鮮。至於肉嘅拼盤可以燒烤，亦都可以打邊爐，最後都係冇揀拼盤，而係叫咗一碟澳洲和牛，首先啲脂肪見到好靚，烚兩烚就即刻可以食，脂肪入口即化，好有油香。整體來講幾滿意食物質素，而且店員服務態度不錯，一有啲咩需要，唔使我哋講都會即刻留意到。