見呢間大家都她似幾讚，價錢又唔貴，咪叫大家一齊去試吓。本來想打去訂位，點知無得留言。後尾問姐姐，原來佢哋3點先開工，所以最好早一兩日訂位。
等位都等咗大半個鐘，不過有電視同最正既係姐姐會叫您去雪櫃拎罐飲品。您知啦，創興廣場個位就真係唔就腳，係中間，點都行半個站。行,到上去熱辣辣，仲聞到鬼咁香既雞煲，真係好想即刻有位坐低，又見好多人等，轉唔轉地點好呢。就係嗰陣阿姐叫我哋去拎罐汽水休息吓，感覺好好。好老實，汽水邊值錢，入去都係任飲。不過，呢個老板好聰明，照顧客人需要，無計較嗰幾蚊。
環境方面，一般酒樓格局，好多人，茶記檯，好在有卡位。六個人坐滿佢，又面對面，傾計好方便。一坐低記得即刻耍叫咗個煲先，因為要等20分鐘。我哋叫咗個小辣，咪看少，一條條紅椒滾起都唔講少。
個大煲一上，好似幾得，好香又有配菜。份量都幾多，六個人有中隻啦。但係小心有雞頭，我食咗舊唔知係咪pat pat。不過，唔好太期望係好好食，但係以百幾，有啤酒汽水任飲，我就覺得好抵。食到咁上吓差唔多食晒就誚姐姐加湯打邊爐。款式大概有三十款左右，
炸魚皮: 必點，加埋湯，好好味，又夠脆。
各款丸都唔錯，推介墨魚丸同白魚蛋，滾起漲卜卜，正。
即包餃，皮薄，有屋企包既感覺，當然無咁重料。
最搞笑姐姐會定時開咪sell 乳酪，好在無太hard sell，都仲可以接受。
大家今晚食得開心，會再encore。係有話明兩個鐘，會嚟埋咗單先，但係無催我哋走。而且，定時會清吓碟，伙計都OK，追佢單無黑面。漏單都有，以咁爆嚟講，我覺得可接受。希望質數保持，唔好人多咗，又加價，保留四送一優惠就好啦。
