餐廳準備咗口罩袋供客人使用，非常細心。器皿有心思，有特色碗碟，印有公司名稱。
餐廳環境舒適，牆架放滿馬來及泰國嘅調味料，櫃門印上類似粉筆畫嘅美食，別有一番風味。
由於星期日訓飽飽先出門口，我地兩點半先入座，已經去到下午茶時段。下午茶餐選擇非常豐富，有喇沙湯粉、泰式撈檬、肉骨茶、海南雞飯及咖哩飯等等，加廿幾蚊仲可以加埋蝦餅同春卷等小食！
=========================
馬來咖喱牛腩飯 $66
咖喱辣到勁度十足，怕辣人士慎入，可惜嘅係牛腩有少少偏硬，薯仔夠哂腍，融入咖哩嘅辣，好過癮
馬來無骨海南雞喇沙 $62
阿媽教落，雞有層啫喱代表新鮮，份量見體；肉質嫩滑，雞皮爽；白飯好大碗😅幾乎食唔哂
喇沙係摻摻底，即係油麵加米粉，雙重口感，份量好多，配料有豆卜、銀牙、蛋，湯底濃郁，配有喇沙辣醬喺中間，怕辣嘅可以自己調節辣度
秘製馬來肉骨茶配飯 $58
肉骨茶偏甜易入口，有杞子圓肉，自己偏好藥材味重一啲嘅，整體味道都唔錯！三件大大件嘅排骨，豆卜支竹份量十足，排骨煮得夠淋，裏面嘅軟骨脆脆咬得開
馬來杏仁蝦餅 $28
外層鋪上杏仁片，蝦餅香口，略嫌稍薄，厚啲會更有口感
泰式鮮蝦米紙卷 $20
米紙包住蝦、生菜、米粉，加入薄荷葉幾清新
凍泰式檸檬茶 (跟餐+$3)
用泰式茶底做嘅凍檸茶，味道都唔錯
Ma Thai魔法梳打（跟餐+$8）
餐廳有心思地俾客人將檸檬汁倒入蝶豆花梳打，酸酸地夠哂醒胃！
馬泰
📍銅鑼灣駱克道408號地舖
