阿爺八鮮鍋

旺角嘅「阿爺八鮮鍋」主打活海鮮同刺身嘅火鍋店。一入到去就見到佢嘅餐桌好整理，位置都好闊落。店員幫我哋安排咗近窗邊嘅位置，對住靚景食飯真係一流! 今晚就試吓佢嘅2.5小時河鮮海鮮雞煲樣樣齊火鍋放題，包括嘅嘢真係好多。首先食咗個雞煲先，我哋就揀咗韓式芝士雞煲，佢嘅芝士份量好多，而且雞煲仲可以再追加，芝士好濃郁仲可以拉絲，正呀！呢個時候就送上左一碟拼盤刺身，入面包括咗兩隻大蝦，北寄北，希靈魚，飽魚同海蜇，刺身真係好鮮味啊！食到咁上下嘅時候可以飲啖湯，見到佢用一個茶壺裝住燉湯，味道好濃郁，而且下面仲有個火煲住，可以keep住啲湯暖笠笠。

食完雞煲同刺身之後就梗係要試吓佢嘅活海鮮火鍋啦！首先就嚟咗一碟霸王海鮮盤，入面已經有齊精選食材，包括大大隻嘅越南大虎蝦，澳洲大龍蝦，蘇格蘭大元貝，奄仔蟹，新鮮鮑魚，仲有蜆！龍蝦同蝦都好大隻，食得出佢好新鮮，因為肉質真係好彈牙。令人最驚艷嘅係啲鮑魚上枱嘅時候仲係好生猛，係咁郁，完全食到所有海鮮嘅鮮味。元貝都洗得好乾淨一啲沙都冇。食多嘢食點可以冇嘢飲？我哋仲加咗$20升級汽水飲品任飲，真係好抵呀！佢嘅湯底有好多款，我哋就揀咗藥膳味。佢嘅火鍋配料都好多而且仲可以再揀返海鮮，真係物超所值！佢嘅蝦滑同墨魚滑超級推薦，好彈牙好足料。另外必點嘅係紫菜響鈴，睇得出佢嘅自家製係好脆，size好巨型！上菜速度快，2.5小時既放題環節好充裕。呢度嘅職員都好熱情，呢個價錢可以食到咁高質素嘅海鮮刺身雞煲同火鍋放題真係好抵！！

3