六十六十火鍋 (已結業)

一向鍾意打邊爐嘅我，近日同同事傾開計，話呢間火鍋店二百零蚊有好多海鮮食，咁又點可以唔黎試下?餐廳位於青山道，由地鐵站行過黎只係需要幾分鐘，相當方便。餐廳分三個時段入座，由於要等朋友放工，就揀咗八點半至十一點，我地八點三去到，門口已經有好多人等緊入座，好彩我地有訂位。火鍋有三款湯底選擇，再自選八款海鮮及六款配料，鍾意食乜就揀乜。由於我地都喜歡蕃茄湯，當然二話不說就揀呢個蕃茄濃湯底脆米泡飯套餐，湯底有大量蕃茄及薯仔，相當足料。海鮮我地揀咗海蜆、肉蟹、鮑魚、扇貝、蠔、鮮魷及貴妃蚌，海蜆鮮甜無沙，肉蟹夠厚肉，亦有唔少膏，蠔雖然唔係好大隻，但味道鮮甜唔腥，鮮魷肉質爽口彈牙，淥一淥就食得，每一樣都好新鮮。另外六款配料揀咗西班牙梅頭肉，豬肉丸，雞件，粟米，響鈴及烏冬，西班牙梅頭肉肉味濃郁，切得夠薄淥一陣就食得。雞件夠滑，粟米都香甜，但因為需要較長時間淥，建議餐廳可以早少少上。響鈴即叫即炸，浸滿湯後食非常好味。食晒所有配料後，店員原本準備上脆米泡飯，但係我地已經太飽食唔落了。埋單每人二百蚊，有海鮮有肉有菜，真係非常抵食。