台灣麵 (已結業)

好耐冇食台灣嘢，去完魚街補充物資，順便嚟食個晚餐。晚餐選擇多，而且價錢合理，特別係我至愛嘅雙排雙格餐，唔洗成日掙扎到底食牛肉麵定肉燥飯好，而且加$4就有台式飲品，性價比高。今次揀咗紅燒牛肉麵配台式豬腳肉燥飯，雖然份量唔係話好多，但一次過滿足兩個要求，令人滿足！紅燒牛肉肉質細嫩，半筋半肉，而且非常入味，湯底香濃，麵質彈牙，係我每次必揀。第一次試台式豬手，燜得夠軟夠腍，一客兩件，份量算多，可惜肉燥份量略嫌少咗啲，唔係好夠撈飯。朋友同我一樣揀咗紅燒牛肉麵，但另一邊係配蒜香雞翼肉燥飯。雞翼外皮香脆，肉質嫩滑，蒜香味頗濃，幾香口。珍珠奶茶奶味香濃，比茶味重少少，微甜，係我鍾意嘅味道，加上珍珠超Q彈，唔錯！椰香奶露椰味都幾濃，加上胚芽增加香味同口感，可惜甜度唔夠，甜返少少更好。呢度嘅食物選擇多，性價比高，重點係仲有雙拼揀，最啱心大心細嘅人。