利寶閣 (已結業)

今日同屋企人黎呢度食片皮鴨放題，呢到係自己出去拎，即場切出黎。而呢度既片皮鴨非常高質，唔單止刀功十足，切到鴨皮好薄，而且鴨肉比較結實，冇乜肥膏，加上麫皮一D都唔肥膩，仲要由蒸籠拎出黎好暖，食落又健康又好味。 呢到都有兩款菜係送既，有花膠響螺雞湯，湯既味道好香濃，響螺同雞味都好重，而且好鮮，唔係味精既味道。雖然響螺肉唔算好多，但花膠同雞都好足料好鮮味。仲有一個係原隻鮑魚花菇，鮑魚同花菇炆得好腍，而鮑魚除左腍，仲保持到彈牙既口感，稱得上係內軟外彈，唔錯。 每人仲會有時令奄仔蟹，有唔同味，我同朋友叫左個雞油花雕蒸同油鹽焗，奄仔蟹細細隻，唔算好大份，但入面好多膏好香濃。而唔同既整法亦有唔同風味，油鹽焗會比較香口，而花雕蒸就比較去油比較健康。 除左附送既野食同片皮鴨任食，仲有好多唔同野可以任食，全部都可以落紙叫。不過因為真係太多款食物，食到飽哂都只叫到一部分。食物基本上分左炸物，燒味，小炒，小食同甜品。食物既款式實在太多，都好難一一講哂，但基本上質素都唔錯。唔同款既燒味都比得上平時酒樓既燒味，而炸物亦炸得好好，全部都好香脆。另外仲有一般既小食，例如鮑汁鳳爪同蘿葡金錢肚，都好香好好味。