〈醋醬海蜇頭〉
前菜方面我地叫左海蜇頭，咬落好爽口，下面仲有好多清甜既青瓜，撈埋醋醬一齊食味道酸酸甜甜，好開胃。
〈原味小籠包〉
樂天皇朝其中一樣名物就係佢既五顏六點既八色小籠包，因為之前黎已經試過，所以今次反而想試返最正宗既原味睇下味道如何。果然都同樣有水準，層皮做得夠薄身，夾起又唔會話好易穿，入面包滿熱辣辣嘅湯汁，肉餡亦好鮮味。
〈無錫鮮肉鍋貼〉
鍋貼外皮煎到金黃色，咬落表皮夠焦香，入面同小籠包一樣咁juicy充滿湯汁，肉餡亦都夠大舊。
〈肉碎欖菜乾煸四季豆〉
個四季豆炒得好夠鑊氣，四季豆爽口，同豬肉碎一齊得好香，我最鐘意鐘意食佢啲欖菜，好惹味。
〈砂鍋雲吞雞〉
呢個砂鍋雲吞雞一上枱我同朋友都嚇一嚇，估唔到咁大煲。入面好足料，有半隻雞，大大粒既雲吞，仲有小棠菜。雞肉嫩滑，雞湯味道鮮甜，雞味十足，另外啲雲吞都煲到索哂啲雞湯，好入味。
〈桃膠糖水〉
甜品方面我地叫左桃膠糖水，佢地既糖水都好足料，一啲都唔馬虎，有雪耳，杞子，紅棗同埋龍眼，絕對係養顏之選。
