墨汁墨丸意$98
已經一早做好心理準備先嚟, 點知都比呢個意嚇親!!!!真係好黑呀......同d廣告彩嘅黑色顏料都一模一樣, 仲要有dd杰杰地, 所有掂完個意嘅碗筷都報銷, d待應唔洗叫都主動比過d新碗筷我地用, 事關真係水洗都唔清呀! 墨丸少許彈牙, 又未去到好彈嘅地步, 不過食得出好新鮮呀!個意粉煮得個時間好好, 只係個汁實在好濃味, 好清楚聞到墨汁味之餘, 即係聞到同食到好腥嘅味, 比較難接受, 好彩個份量係好少嘅, 一個人都食得哂, 不過我地就唔會囉~呢個都算係一個幾特別嘅菜, 大開眼界!不過如果問我地嘅話, 都應該唔會再叫下次
鴨汁荷葉飯$80
我唔會話佢差, 但亦唔覺好好食, 因為成個都好濕(本人較為鐘意食咬落一粒粒嘅飯), 唔係好香, 不過好多碎饀, 譬如菇呀咁, 同埋真係唔好睇少個份量, 4個人食唔哂囉, 我唸起碼6個人先叫呢個會好好多, 因為你仲想叫第d餸架嘛
蟶子兩食(蒜蓉蒸 / 豉椒炒)$38 x 4 = $152
個笑面係想比呢隻巨型又爽口甜美嘅蟶子嘅, 大家都認為用蒜蓉開邊蒸都係好一般, 冇乜特別, 反而個豉椒炒就冇得頂!!!!真係讚口不絕!因為個汁較得非常之好, 濃度又適中, 唔太杰 / 稀, 好夠惹味但又唔會食完就已經渴死, 之前去開好幾間都冇呢度炒得咁好手勢, 唔會熟過頭又仲好嫩同彈牙.....食咁少真係唔夠喉
沙拉骨$55
唔夠餸夾硬叫多個, 見到人地嗰碟好靚仔, but剛巧我們嘅就炸過火咗, 黑咗d, 食落係真嘅有幾多骨, 唔會好似出面嘅全部啖啖肉, 可讚嘅係佢呢度唔會求其落沙拉醬上面就算, 而真係有兜過, 每一邊骨都沾得到醬
P.S. 最後送個蕃薯糖水, 夠薑!!!!!!!正呀!!!!!!
食過呢次之後都明白點解咁多人讚, 碟碟都真係有功架, 材料新鮮, 做野又快手, 你話有禮貌就難d喇, 不過食得大排檔都可以不洗咁介意嘅, 呢度如果唔係咁貴(仲要收5%charge), 我都會再嚟多試幾味
4個人4個餸埋單$404
